OPRICHTING CARNAVALSVERENIGING DE BOEMELÈRE
De carnavalsvereiniging is officieel opgerich in ’t joar 1955. Mer ’t veurspeul woar al in 1953 begoes. Doe woar deur Piet Jansen, d'r durpskapper — bie de ouw generatie beter bekind oonder ziene rennersnaam d’r Bras — al ’ne Road van Elf bie mekaar gebrach. Höäm zelf ging es iersjte Preens fungere.
Deur de watersnoodramp in Zeeland woaren dat joar alle carnavalsfeeste afgelas. D’r Jansen houw echter waal al unne naam bedach, namelik: de Boemelère. He woar óch al ’n carnavalsleedsje gecomponeerd. Veul lede van de Road van Elf woaren, net wie hun veurvaders, “buffetgangers” genumpd, en doa ging dat leedsje dan óch euver. ’t Refrein woar:
“Veer Boemelère, veer drienke geire,
de luuj van vreuger hubbe ’t gedoa.
Oeveur zówwe veer daomit neet wier goa.”
In 1954 woar alles wir in vergetelheid geraak, mer in 1955 wór de carnavalsvereiniging officieel op de bein gezet. Bertus Bloemert en Giel Munnix woare de luuj die destieds ’ne durpsvergadering in ’t patronaat houwe oetgerópe.
Op die vergadering woar ’n driemansjap aangewezen um ilf luuj bie mekaar te sjarrele die es Road van Elf zówwe fungere. Dat lukte oeteindelijk: d’r woaren twelf luuj beschikbaar, oevan d’r inne tot Preens gekóze woord. Dat woar Jan Kreuwels, dé es oudste en enige getrouwde lid dit ambt aanvaardde.
Dat woar zeker ging gemékkelike opgaaf, want d'r groep hów ging ervaring mit ’t houwe van ’ne zogehete zitting. Mer ze krege gooi en waardevolle hulp van Jean Beyers oet Cadier en Keer. D’r Beyers maakte hun weegwies in ’t carnavalsvak, zoe es ’t opsjtille van ’n proclamatie en ’t oetroope van d'r Preens.
Mer mit valle en opstoan is deze vereiniging toch groét gewóre. Noe kin men zègke det de Boemelère oetgegreujd zunt tot ’n carnavalsvereiniging die men in ’t ganse Mergelland en Heuvelland respect veur heat. Veural de menier wie ze zich veurdoon en de menier wie in Banholt carnaval geveerd wurt.
Die belèving kump hie eeder joar wir tot oetdrukking in de carnavalsoptocht op carnavalsmondig. Dan presenteere ze zich op ’ne originele meneer of speule toneel veur duizenden toesjouwers langs de route.
Veer deenke dan óch dat veer móge vaststelle dat de Boemelère ’n vaste stek gekrege heat bie de inwoeners van ’t Boemelriek en omgeving.
UT ZEUKE VAN PREENS CARNAVAL
Ut zeuke van unne Preens carnaval is altied ’n biezóóndere gebeurtenis bie de Road van Elf. In de loap van de joare höbbe verschillende luuj die taak gehad en veural in de beginjoare woar dat neet altied zoe gemakkelik.
Zoe woort in de iersjte joare ’t gánse joar deur gespeculeerd wea Preens zów wille of kinne weere. Vreuger woare d’r twie zittinge. Tiedes de twiede zitting woort miestal de nuuje Prins geïnstalleerd. Die twiede zitting woar vlak veur carnaval en bie de luuj die verantwoordelik woare veur ’t zeuke van der nuuje Prins, begoes ’t kwik langzaam te stiege. ’t Wear bienoa carnaval en men hauw nog ginne Preens gevoonde…!
Tengewoordig geit dat toch wal é bietsje soepeler. De aaftreijende Prins en iemes van ’t besjtuur van de carnavalsvereineging goan same euverligge en trikke d’r op oet om d'r volgende Preens te ‘zeuke’. Soms meldt zich al ins iemes en dat is natuurlik gemekkelik. D’r weare aafsproake gemak mit de desbetreffende persoen en de veurbereidinge kinne beginne.
Es ’t nog ’n paar weeke veur de zitting is, begint toch eederein dea mit de veurbereidinge te make heat, zenuwachtig te weare. En dan is ’t oplette gebloaze, want eederein begint te vroage: “Wea wurt Preens?” ’t Veiligste antwoord is toch “ander onderwerp”, want ’n verspreking is zoe gebeurd en veurdat ste ’t wits, zow d’r dan al ’n nuuje Prins bekind zie.
’n Leuke anekdoote: noa ’n hof nach feeste vroag d'r toekomstige Preens: “Hub ich noe eigelek joa gezág…?”
Dat zunt toch sjoen momente tiedes de veurbereidinge op ’t weere van PREENS CARNAVAL.
